-
పెద్దప్రేగు క్యాన్సర్ వ్యాప్తికి చక్కెర పానీయాలు కారణం
-
అమెరికా పరిశోధకుల అధ్యయనంలో సంచలన విషయాల వెల్లడి
-
గ్లూకోజ్-ఫ్రక్టోజ్ మిశ్రమంతో క్యాన్సర్ కణాల వేగవంతమైన వ్యాప్తి
కొలొరెక్టల్ క్యాన్సర్ రోగులు తీసుకునే ఆహారం విషయంలో చాలా జాగ్రత్తగా ఉండాలని నిపుణులు ఎప్పటినుంచో చెబుతున్నారు. ఇటీవల అమెరికా పరిశోధకులు జరిపిన ఒక అధ్యయనంలో, మనం సాధారణంగా తాగే చక్కెర పానీయాలు, పండ్ల రసాలు (జ్యూసులు) పెద్దపేగు క్యాన్సర్ చివరి దశలో ఉన్నప్పుడు శరీరంలో మరింత వేగంగా వ్యాప్తి చెందడానికి కారణమవుతున్నాయని తేలింది.
అమెరికాలోని టెక్సాస్ యూనివర్సిటీకి చెందిన ఎండీ ఆండర్సన్ క్యాన్సర్ సెంటర్ శాస్త్రవేత్తలు ఈ పరిశోధన నిర్వహించారు. చక్కెర పానీయాలలో ఎక్కువగా ఉండే గ్లూకోజ్-ఫ్రక్టోజ్ మిశ్రమం క్యాన్సర్ కణాలపై ఎలాంటి ప్రభావం చూపుతుందో లోతుగా అధ్యయనం చేశారు. కేవలం గ్లూకోజ్ లేదా ఫ్రక్టోజ్ విడివిడిగా కాకుండా, ఈ రెండింటి మిశ్రమం క్యాన్సర్ కణాలను మరింత చురుకుగా మార్చి, అవి వేగంగా ఇతర అవయవాలకు, ముఖ్యంగా కాలేయానికి వ్యాపించేలా చేస్తున్నట్లు గుర్తించారు.
శరీరంలో ఏం జరుగుతోంది? ఈ చక్కెర మిశ్రమం మన శరీరంలోని సార్బిటాల్ డీహైడ్రోజినేస్ (SORD) అనే ఎంజైమ్ను ఉత్తేజపరుస్తుందని పరిశోధకులు కనుగొన్నారు. ఈ ఎంజైమ్, కొలెస్ట్రాల్ను నియంత్రించే మార్గాన్ని ప్రేరేపించడం ద్వారా క్యాన్సర్ కణాల వ్యాప్తికి కారణమవుతోంది. గుండె జబ్బులకు వాడే స్టాటిన్ల వంటి మందులు కూడా ఇదే కొలెస్ట్రాల్ మార్గాన్ని లక్ష్యంగా చేసుకుని పనిచేస్తాయి. అంటే, SORD ఎంజైమ్ పనితీరును అడ్డుకోవడం ద్వారా క్యాన్సర్ వ్యాప్తిని నిరోధించే అవకాశం ఉందని ఈ అధ్యయనం సూచిస్తోంది.
ఈ పరిశోధనలో పాల్గొన్న అసిస్టెంట్ ప్రొఫెసర్ జిహ్యే యున్ మాట్లాడుతూ. “రోజువారీ ఆహారం కేవలం క్యాన్సర్ వచ్చే ప్రమాదాన్ని మాత్రమే కాదు, వ్యాధి వచ్చిన తర్వాత అది ఎలా ముదురుతుందనే దానిపై కూడా ప్రభావం చూపుతుందని మా పరిశోధనలో స్పష్టమైంది” అని వివరించారు.
చాలా మంది క్యాన్సర్ రోగులకు పోషకాహారం కోసం వైద్యులు, ఆరోగ్య నిపుణులు అధిక చక్కెరలు ఉండే సప్లిమెంట్లు, పండ్ల రసాలు సిఫార్సు చేస్తుంటారు. తాజా పరిశోధన నేపథ్యంలో క్యాన్సర్ రోగుల ఆహారపు అలవాట్లపై, ముఖ్యంగా చక్కెర పానీయాల విషయంలో మార్గదర్శకాలను పునఃసమీక్షించాల్సిన అవసరం ఉందని నిపుణులు అభిప్రాయపడుతున్నారు. క్యాన్సర్ రోగులు చక్కెర పానీయాలకు దూరంగా ఉండటం వల్ల వ్యాధి వ్యాప్తిని నియంత్రించవచ్చని ఈ అధ్యయనం స్పష్టం చేస్తోంది.
Read also : SunnyLeone : వెండితెరపై సన్నీ లియోన్ కొత్త అడుగు
