హైదరాబాద్ – విజయవాడ నగరాలను అనుసంధానం చేసే నేషనల్ హైవే 65ను 4 నుంచి 6 వరుసలకు విస్తరించే పనుల విషయమై కీలక అప్డేట్ వచ్చింది. ఈ పనులను రెండు నెలల్లో ప్రారంభిస్తామని కేంద్ర రహదారి, రవాణాశాఖ మంత్రి నితిన్‌ గడ్కరీ హామీ ఇచ్చినట్లు భువనగిరి ఎంపీ కోమటిరెడ్డి వెంకట్‌రెడ్డి స్పష్టం చేశారు. ఈ మేరకు సోమవారం ఢిల్లీలో కేంద్ర మంత్రిని కలిసిన కోమటిరెడ్డి రోడ్డు విస్తరణతో పాటు, 17 బ్లాక్స్పాట్లను సరిదిద్దాలని మంత్రికి విజ్ఞప్తి చేశారు. వీటిపై కేంద్రమంత్రి సానుకూలంగా స్పందించారన్నారు.
బ్లాక్‌స్పాట్ల మరమ్మతు పనులకు టెండర్లు పిలిచామని, వెంటనే పనులు మొదలుపెడతామన్నారని ఎంపీ కోమటిరెడ్డి వెల్లడించారు. ఈ పనులు ప్రారంభమై రోడ్డు విస్తరణ జరిగితే.. ప్రయాణం మరింత సులభం కానుంది. గంట ప్రయాణ సమయం ఆదా అవుతుంది.
హైదరాబాద్ – విజయవాడ జాతీయ రహదారి 65పై ప్రమాదాలు ఎక్కువగా ఉన్న ప్రదేశాల్లో దిద్దుబాటు పనులు చేపట్టాలని, వెహికల్‌ అండర్‌పాస్‌ (VUP) నిర్మాణం చేపట్టాలని గత కొంత కాలంగా డిమాండ్లు వినిపిస్తున్నాయి.
నేషనల్ హైవేస్‌ అథారిటీ ఆఫ్‌ ఇండియా ఈ ఏడాది ప్రారంభంలో రెండుసార్లు టెండర్లు పిలిచినా.. పనులు చేపట్టేందుకు ఒక్క కంపెనీ కూడా ముందుకు రాలేదు. కేంద్రం హైవేపై సమగ్ర సర్వే నిర్వహించి.. ఈ మార్గంలో 17 బ్లాక్స్పాట్లను గుర్తించింది. పనులు చేపట్టేందుకు రూ.450 కోట్లు మంజూరు చేసినా.. పనులు చేపట్టే కాంట్రాక్టర్లు ముందుకు రాలేదు.
6 లేన్ల వైజాగ్ పోర్ట్ హైవేకు గడ్కరీ ఆమోదంఈ రోడ్డు విస్తరణ, బ్లాక్‌స్పాట్ పనులపై గతంలో పార్లమెంట్ వేదికగా నల్గొండ, భువనగిరి ఎంపీలు ఉత్తమ్ కుమార్ రెడ్డి, కోమటిరెడ్డి వెంకట్ రెడ్డి లేవనెత్తారు. కేంద్ర మంత్రి నితిన్‌ గడ్కరీకి వినతిపత్రాలు కూడా సమర్పించారు. తాజాగా.. మరోసారి కోమటిరెడ్డి కేంద్రమంత్రి గడ్కరీని కలవగా ఆయన సానుకూలంగా స్పందించారు.
