- 66 ఏళ్ల వయస్సులోనూ ఫిట్గా నాగార్జున
- 15 ఏళ్లుగా మోకాలి నొప్పితో పోరాటం
టాలీవుడ్ ‘కింగ్’ అక్కినేని నాగార్జున ఫిట్నెస్ గురించి ప్రత్యేకంగా చెప్పాల్సిన అవసరం లేదు. 66 ఏళ్ల వయస్సులోనూ యవ్వనంగా, ఫిట్గా కనిపించే ఆయన, గత 15 ఏళ్లుగా ఓ ఆరోగ్య సమస్యతో పోరాడుతున్నట్లు స్వయంగా వెల్లడించి అభిమానులను ఆశ్చర్యానికి గురిచేశారు. తాను తీవ్రమైన మోకాలి నొప్పితో బాధపడుతున్నానని నాగార్జున తెలిపారు.
ఇటీవల ఒక కార్యక్రమానికి ముఖ్య అతిథిగా హాజరైన సందర్భంగా మీడియాతో మాట్లాడిన ఆయన, “సుమారు 15 ఏళ్ల క్రితం మోకాలి నొప్పి మొదలైంది. అప్పటి నుంచి ఈ సమస్య నన్ను వెంటాడుతూనే ఉంది. అయినప్పటికీ ఇప్పటివరకు మోకాలి రీప్లేస్మెంట్ సర్జరీ చేయించుకోలేదు. సాధ్యమైనంత వరకు దాన్ని వాయిదా వేయాలనే ప్రయత్నం చేస్తున్నాను” అని స్పష్టం చేశారు.
నొప్పి నుంచి ఉపశమనం కోసం ల్యూబ్రికెంట్ ఫ్లూయిడ్స్, పీఆర్పీ (PRP) వంటి చికిత్సలు తీసుకున్నట్లు నాగార్జున తెలిపారు. డాక్టర్ల సూచనలతో మోకాలి లోపల కణజాలం పునరుత్పత్తి అయ్యేలా చూసుకున్నానని చెప్పారు. “నొప్పి లేకపోయిన రోజుల్లో కూడా ఉదయం లేవగానే మోకాలి కోసం ప్రత్యేకంగా రిహాబిలిటేషన్ వ్యాయామాలు చేసేవాడిని. నిరంతరం దానిపై దృష్టి పెట్టడమే నా బలం” అంటూ తన క్రమశిక్షణను వివరించారు.
ప్రస్తుతం తన ఆరోగ్యం బాగానే ఉందని, అయితే సర్జరీ చేయించుకోవాలనే ఆలోచన లేదని నాగార్జున స్పష్టం చేశారు. ఆయన వ్యాఖ్యలతో తన ఫిట్నెస్ వెనుక ఉన్న క్రమశిక్షణ, పట్టుదల స్పష్టంగా కనిపిస్తోందని అభిమానులు సోషల్ మీడియాలో ప్రశంసల వర్షం కురిపిస్తున్నారు. నాగార్జున ఆరోగ్య స్పృహ, నిబద్ధత అందరికీ ఆదర్శమని కొనియాడుతున్నారు.
