ఖమ్మం, సెప్టెంబర్ 22, (న్యూస్ పల్స్)
కష్టమొస్తే.. దేవుడిని తలచుకుంటాం. భారమంతా.. ఆ భగవంతుడి మీదే వేసి ముందుకు కదులుతాం. కానీ.. ఇప్పుడు ఆ దేవుడికే కష్టమొచ్చింది. ఏపీలో భద్రాద్రి రామయ్యకు సంబంధించిన వందల ఎకరాల మాన్యం.. అన్యాక్రాంతమవుతోంది. రాత్రికి రాత్రే అక్రమ నిర్మాణాలు వెలుస్తున్నాయి. రాష్ట్ర పునర్విభజన సమయంలో ఏడు మండలాలను ఏపీలో కలిపారు. అందులో.. భద్రాచలానికి ఆనుకొని ఉన్న పురుషోత్తపట్నం గ్రామం కూడా ఆంధ్రాలో కలిసింది. ఈ ఒక్క ఊళ్లోనే రాములవారికి 889.5ఎకరాల భూమి ఉంది. ఇందుకు సంబంధించిన.. హక్కు పత్రాలు కూడా దేవస్థానం అధికారుల దగ్గరున్నాయి.
అయితే.. విభజన సమయంలో రాములోరి భూమి ఏపీ భూభాగంలోకి వెళ్లిపోవటంతో..ఆ భూములు కబ్జా కోరల్లో చిక్కుకుంటున్నాయి. రామయ్య భూముల్లో ఒక ఇంటి నిర్మాణం జరిగిందని దేవస్థానం అధికారులకు సమాచారం అందింది. దీంతో మరుసటిరోజు వెళ్లి ఆ ఇంటిని తొలగించారు. ఈ విషయమై ఏపీ పోలీసు, రెవెన్యూ అధికారులకు సమాచారం ఇచ్చినా వారు సానుకూలంగా స్పందించలేదని భద్రాద్రి ఆలయ అధికారులు చెబుతున్నారు. దేవస్థానం భూముల్లో ఇటీవల పలుమార్లు నూతనంగా నిర్మాణం చేపట్టిన ఇళ్లను తొలగించేందుకు సహకారం కోరినా.. ఏపీ నుంచి స్పందన కరువైందని దేవస్థానం అధికారులు వెల్లడిస్తున్నారు.దేవస్థానం భూముల్లో ఇప్పటి వరకు 459 ఇళ్లు నిర్మించినట్లు గుర్తించామని భద్రాద్రి ఆలయ ఈవో చెప్పారు. అలాగే స్వామివారి భూములను సాగుచేస్తున్న వారి నుంచి డ్యామేజెస్‌ ఫర్‌ యూజర్‌ చార్జీల రూపంలో ఏటా రూ.25 లక్షలకు పైగానే రావాల్సి ఉందని అధికారులు చెబుతున్నారు.
రాముయ్య భూముల్లో ఆక్రమణలు జరుగుతున్న ప్రతిసారి మా సిబ్బంది ఫిర్యాదులు చేస్తున్నా అక్కడి పోలీసులు కేసులు నమోదు చేయటం లేదని ఆలయ ఈవో ఆరోపించారు. అక్కడి పోలీసుల ఉదాసీనత కారణంగా ఆక్రమణలు పెరిగాయని అంటున్నారు. వాటిని తొలగించి రామయ్య భూములను దేవస్థానానికి అప్పగించాలని అధికారులను కోరుతున్నా.. ఏపీ ప్రభుత్వం సహకారం అందించటం లేదని అన్నారు.స్వామివారి భూములను భద్రాచలం దేవస్థానానికి అప్పగించాలని హైకోర్టు ఉత్తర్వులు ఉన్నా ఏపీ ప్రభుత్వం రామయ్య భూములను దేవస్థానానికి అప్పగించడం లేదని భక్తులు సైతం ప్రశ్నిస్తున్నారు. ఆక్రమణల విషయంలో రెవెన్యూ, పోలీసు అధికారుల ఉదాసీనతపై వారు ఆగ్రహం వ్యక్తం చేస్తున్నారు.
